(1) lang na Shingja Miwa ga, laika sharin jawng yu hpawng galaw
(1) lang na Shingja Miwa ga, laika sharin jawng yu hpawng hpe July shata praw 3 ya shana daw hkying 4:00pm aten hta Hparat Pang Lai Gawknu kaw galaw la lu sai re.
Hpawng hta ningtawn ai No. 1 kaw nna No. 10 lu ai jawngma ni hpe laksan kumhpa shagrau nna, san poi awng ai jawngma ni hpe mung, jawng yu lakmat shagrau ai lam galaw ai.
Dai hpang Sara N-gang Zau Dan Awng (Jawng lit hkam) kaw nna tsun ai hta “Ningpawt ninghpang hpe shata 4 sharin da ngut sai re majaw, matut nna lung mayu ai ni gaw, July shata 10 ya kaw nna, Level 2 hpe sharin sa wa na re. Dai kaw mung aten nga ai ni, dang di ai ni, rau ang ai ni sharin hkamla mai ai. Ndai Level 2 hpe shata 8 sharin na re majaw, yawng n-gun dat nhtawm sharin hkamla ga Miwa laika hpe madang langai mi du hkra sharin hkamla sa wa ga” nga nna tsun ai.
Shingja Miwa ga, laika sharin jawng hpe lai wa sai March shata praw 1 ya shani hta sharin sa wa ai rai nna, jawngma yawng marai (62) tup sharin hkamla lu sai rai nhtawm, July shata praw 10 ya shani kaw nna gaw Level (2) hpe bai hpaw sharin sa wa na re lam chye lu ai.
Hpawng lamang hta saw shaga da ai myitsu salang ni, hpung woi sara ni, jawngma kanu kawa ni hte jawnma ni sa du shang lawm ai hte angwi apyaw galaw la lu sai hpe chye lu ai.
