Gumshem Myen hpyen dap ni hpe KIA ni Nawng Swe mare makau kaw hkap shingla gasat
Mungmyit Sinli Ga (Kachin Sub-State), KIA Masat (4) Da Ba, Masat (39) Dap Nawng Dap Dung ginra, Nawng Swe mare, Manbang lam numshe Maza Kawng kaw July shata praw 10 shani ka-ang hkying 12: 14pm aten daram hta Sinli maga na lung wa ai gumshem Myen hpyen dap ni hpe KIA hpyen hpung ni hkap shingla gasat ai kawn gasat poi byin lam chye lu ai.
Ndai gumshem Myen hpyen dap Hk.L.Y (241,242) dap na pawng hpawm hpyen n-gun (100) daram gaw, KIA ni shara la nga ai de shamu shamwt lung wa ai majaw, hkap shingla gasat dat ai re lam, shawng lam na lit nga ai salang ni kaw na chye lu ai.
KIA Masat (4) Dap Ba, Masat (8) Dap Dung ginra, Namhpakka kaw dap jung shara jahkrat nga ai gumshem Myen hpyen dap Hk.L.Y (123) dap ni July shata praw 9 ya shana hkying 7:00pm aten daram kaw nna, laknak kaba hkrup mara gap shadam ai majaw, mungshawa marai lahkawng hkala hkrum ai lam chye lu ai.
Gumshem Myen hpyen dap ni, gap dat ai laknak kaba gaw, Nahpai mare na Salang Kadung Brang Awng na nta kaw wa hkrat kapaw ai majaw, kasha asak (19) ning re ai Kadung Bawk San hte asak (9) ning re ai kanau Kadung Seng Din yan nau hkala hkrum ai rai nna, hkala hkrum ai yan nau hpe ya aten ninawn ai tsi gawk hta tsi tsi hkamla nga ai lam, ginra masha ni tsun ai kaw na chye lu ai.
KIA Masat (5) Dap Ba, Masat (18) Dap Dung ginra, Nam San yang, Awng Ja hte Madi Yang lapran kaw, July shata praw 10 ya shana daw hkying 3:00pm aten daram kaw nna, gumshem Myen hpyen dap ni hte KIA hpyen hpung ni lahkawng maga sinat kaba ni hte gap gasat hkat nga ai lam, buga masha ni kaw na chye lu ai.
July shata praw 9 ya shani hta mung, Hkang Kai Bum, Hpunpyen Bum, Bumre Bum, Hka Ya Bum hte Na Hpaw Bum kaw dung ai gumshem Myen hpyen dap ni kawn, Nam San Yang hpyen man hte Laiza grup yin shara de laknak kaba ni hte gap bun nga ai re.
Ginjaw ginra, Nam San Yang hpyen man maga de, hpyen n gun jat lung wa ai gumshem Myen hpyen hpung ni hpe KIA hpyen hpung ni lam lapran kaw hkap shingla gasat ai lam ding yang ngu na galaw nga ai hpe mung chye lu ai.
