Ginjaw ginra hte Mungmyit Sinli Ga ginra hta gasat gala majan matut byin
Ginjaw ginra, KIA Masat (5) Dap Ba, Masat (24) Dap Dung ginra hta July shata 13 ya jahpawt hkying 5:30am aten daram kaw nna, Manmaw Dawhpum Yang maga na Nam San Yang maga de, hpyen karum lung wa ai gumshem Myen hpyen dap ni hpe KIA hpyen hpung ni Hka La kadawng kaw, hkap shingla gasat ai lam chye lu ai.
Gumshem Myen hpyen hpung ni hpe KIA Masat (18,24) ni hte Mungshawa Hpyen Hpung (MHH) pawng hpawm hpung ni hkap gap gasat ai hta gumshem Myen hpyen ni a, hpyen lang arung arai n kau hpe padang dip zing la lu ai lam, shawng lam shiga lawk kaw na chye lu ai.
Mungmyit Sinli Ga (Kachin Sub-State), KIA Masat (6) Da Ba, Masat (9) Dap Dung ginra hta mung, July shata 13 ya jahpawt hkying 9:00am aten daram hta Kuthkai maga na lung wa ai gumshe Myen hpyen hpung ni hpe Nam Um mare makau kaw, KIA Masat (9) Dap Dung ni hkap gap gasat ai lam chye lu ai.
Ya aten hta gumshem Myen hpyen dap ni gaw, KIA ni nga ai shara de hpyen n-gun law law hte shamu shamawt htu lung wa ai majaw, shani shagu ngu na gasat gala majan byin nga ai lam chye lu ai.
