Hpyen n gun jat lung wa ai gumshem Myen hpyen hpung ni hpe KIA ni hkap gap gasat

Hpyen n gun jat lung wa ai gumshem Myen hpyen ni hpe July shata 20 ya shana maga hkying 5:00pm aten daram hta Laja Yang mahkrai pawt kaw KIA ni hkap gap gasat ai lam chye lu ai.

Ndai gumshem Myen hpyen hpung ni gaw, Manmaw, Dawhpum Yang maga na Nam San Yang hpyen man maga de, hpyen n gun jat lung wa ai hpe KIA ni hkap gap ai kawn gasat poi byin ai lam chye lu ai.

July shata 20 ya shani hta sha, Hkaya, Bumre kaw dap jung nga ai gumshem Myen hpyen ni kawn majan nbyin ai Mai Sak Pa mare maga de, laknak kaba 4 lang gap shadam bun ai lam mung nga ai re.

Mani July shata 19 ya shana hkying 9:00pm aten daram kaw nna, dai ni July shata 20 ya jahpawt du hkra, Masat (1) Dap Nawng Daju makawp maga ginra, Sama lam numshe mayan hta gumshem Myen hpyen ni hte KIA ni laja lana gasat poi byin ai lam, ginra masha ni tsun ai kaw na chye lu ai.

Ginjaw ginra de gumshem Myen hpyen ni, July shata praw kaw nna, hpyen n gun law law hte htu shadut chyinglau shang wa ai majaw, Manmaw, Myitkyina modo lam mayan hta shani shagu ngu na gasat gala majan byin nga ai re.