Gasat poi byin ai hpang gumshem Myen hpyen dap ni nbungli hte bawm wa jahkrat

Ginjaw ginra, KIA Masat (5) Dap Ba ginra hta July shata 27 ya shani hkying 11:00am aten daram kaw na shana hkying 4:00pm aten du hkra, gumshem Myen hpyen dap hte KIA ni gasat gala majan byin ai lam chye lu ai.

Mali Yang maga na lagaw lam lung wa ai gumshem Myen hpyen dap hpe KIA ni Madi Yang, Hka San Krung hte Malang Yang mayan kaw hkap gap gasat dat ai kawn laja lana gasat poi byin ai lam, shawng lam shiga lawk kaw na chye lu ai.

Gasat poi byin ngut ai hpang, July shata 27 ya shana hkying 10:20pm aten daram hta gumshem Myen hpyen dap ni, jet nbungli hte Nam San Yang mare makau grup yin shara ni hta bawm wa jahkrat bun ai lam, ginra masha ni tsun ai kaw na chye lu ai.

Ginjaw ginra, Nam San Yang hpyen man maga de gumshem Myen hpyen dap ni hpyen n gun law law hte htu shadut shang wa ai majaw, gumshem Myen hpyen dap ni hte KIA ni shani shagu ngu na gasat gala majan byin ai shata mi daram du wa sai re.