Myen hpyen ni gap dat ai sinat kaba, mungmasha ni a nta kaw hkrat kapaw nna si hkala hkrum

KIA Dap Ba ( 2 ), Dap Dung ( 14 ) ginra, Ting Kawk mare makau Rawang kawng kaw, July praw 9 daihpawt hkying 2:00am aten hta Danai maga na yu wa ai Hk.L.Y ( 238 ) na hpyen hpung hte KIA hpyen hpung ni gasat gala majan byin ai lam na chye lu ai.

Gasat majan byin ai hta Myen hpyen ni mare de sinat kaba gap bang ai majaw, Hpunau Rawang salang Ah Tsing a nta kaw sinat kaba si wa hkrat kapaw nna, salang Ah Tsing a kan hte magyi kaw hkra, madu jan mung kan hte magyi kaw pala hkyep hkra ai, kasha asak 3 ning re La kasha gaw dai kaw jang si mat ai lam chye lu ai.

Myen hpyen ni gaw nta htinggaw 20 daram nga ai Rawang kawng na mungshawa ni yawng hpe rim gyit zing ri san jep galaw nhtawm, dai na de hkying 6:00pm aten daram hta yawng hpe bai dat sai lam, Hkristu Hpung na Hpung sara langai hpe mung hkra lagaw kaw gap daw ya nna, gun ai alu gumhpraw mung la kau ya ai lam, bai nna Sam la langai a lagaw kaw mung gap hkra ya ai lam, dai buga na salang langai shana wa ai.

Machyi hkala hkrum ai masha ni ya aten Danai tsi rung hta tsi tsi hkamla nga ai lam, salang Ah Tsing gaw grai machyi sawng ai lam chye lu ai.