Laiza makau grup yin shara ni de, gumshem Myen hpyen ni sinat kaba hte hkrup mara gap bun
Ginjaw ginra, Bumre kaw dap jung shara la nga ai gumshem Myen hpyen dap ni, July shata 30 ya shana hkying 8:55pm aten daram kaw nna, Nam San Yang hpyen man hte Laiza makau grup yin shara de, sinat kaba gap bun ai lam chye lu ai.
KIA Masat (1) Dap Nawng Daju ginra hta mung, July shata 29 ya jahpawt hkying 9:30am aten daram kaw nna, Mali Yang kaw dap jung nga ai gumshem Myen hpyen dap hpe KIA hpyen hpung ni sa htim gap dat ai kawn laja lana gasat poi byin ai.
Gasat poi hta Myen hpyen dap maga machyi hkala masha law mat ai majaw, KIA ni nga ai maga de, shana daw hkying 4:30pm hta kalang hkying 5:20pm aten daram hta kalang Jet Fighter nbungli hte bawm wa jahkrat bun ai lam, buga masha ni kaw na chye lu ai.
Ginjaw ginra de gumshem Myen hpyen dap ni hpyen n-gun law law hte htu shadut tawt lai shang wa ai majaw, July shata praw 3 ya shani kaw nna KIA hte gasat gala majan byin ai gaw, shata mi du wa nga sai re.
Gumshem Myen hpyen maga hpyen n gun jat nga ding yang re majaw, lahkawng maga hpyen masa shaja hkat nga ding yang rai nna, gasat gala majan gaw matut nna naw byin wa mai ai lam, shawng lam na lit nga ai salang ni tsun ai kaw na chye lu ai.
