Myen hpyen ni, N-ga Ga mare mungshawa ni a dum nta na arung arai ni la kau ya
Sinna Ginwang Ginjaw KIA Dap Ba ( 2 ), Dap Dung ( 14 ) ginra hta shamu shamawt nga ai Myen hpyen hpung ni, July praw 8 ya shani N-ga Ga mare na mungshawa ni a nta hkan, adup hpaw nna arung arai ni hte KBC nawku jawng wang kata na dung lahkum, solar jak ni la kau ya ai lam, shawnglam shisawk ni kawn chye lu ai.
KIA Dap Ba ( 2 ) Dung ( 14 ) ginra de laiwa sai June praw 3 ya shani kawn Myen hpyen dap ni htim gasat hpang wa ai majaw, gasat majan byin wa ai hta N-ga Ga mare hte mare law law hpyen koi yen ra mat ai.
Myen hpyen dap kawn Ja maw, Pat maw hkan bungli galaw sha nga ai mungshawa ni hpe June 15 ya hpang jahtum pru yen na matu, laika shabra laiwa sai.
Dai ni du hkra gasat majan nzim ai sha n-ga Myen hpyen dap ni kawn mare kata de sinat kaba hkrup mara gap, mungmasha ni hpe zing ri, hpyen koi yen mat ai dum nta ni hkan na arung arai ni hpe la kau ya ai lam, salang langai tsun ai kaw na chye lu ai.
