Mali Yang makau grupyin de gumshem Myen hpyen ni nbungli bawm wa jahkrat

Manmaw Myitkyina lam Ja Pu lai Mali Yang mare mayan kaw, August shata praw 4 ya shani hkying 11:35am jan aten daram hta Tada Oo maga na lung wa ai gumshem Myen hpyen dap a, Jet nbungli 2 hte bawm wa jahkrat bun ai lam chye lu ai.

Ndai zawn gumshem Myen hpyen ni nbungli bawm wa jahkrat bun ai hta Waingmaw hte Myitkyina de len shalai ya ai, Mali Hka wanjak masat shadaw (N 81) wan sumri hpe bawm wa jahkrat jahten kau ya ai hpe hpyen masa a majaw, lawan ladan bai galaw lu na matu yakhkak ai lam chye lu ai.

Mali myihprap wan hten mat ai hte seng nna buga company kaw nna mung, kade ram kaning rai hten mat ai hpe ya aten na gasat poi sat lawan a majaw, rai nlu hkan yu ai hte jep joi yu ngut ai hpang bai tang madun na re hpe ndau shara laika kaw tsun da ai.

Ginjaw Ginra de ya aten hta mung, gumshem Myen hpyen dap ni Manmaw, Myitkyina hte hka lam hku nna hpyen n-gun jat nga ding yang re majaw, hpyen masa naw shaja hkat nga ding yang re hpe mung chye lu ai.