KIA Masat (26) Dap Dung ginra hta gasat gala majan laja lana byin nga
KIA Masat (9) Dap Ba, Masat (26) Dap Dung ginra, Nam Kada hte Pan Se mayan kaw August shata 11 ya jahpawt hkying 5:00am aten daram kaw nna, Gumshem Myen hpyen dap Hk.M.Y (116) hte Sam Hkyeng Pyi Tu Tsit (SNA) pawng hpawm hpyen hpung ni hte KIA ni gasat gala majan laja lana byin ai lam chye lu ai.
Gumshem Myen hpyen hte Pyi Tu Tsit pawmg hpawm hpyen hpung ni gaw, KIA ni shara la nga ai ginra de, htu shadut chyinglau shang wa ai majaw gasat poi byin ai re lam, shawnglam lit nga ai salang ni kaw na chye lu ai.
Gasat poi byin ai shara kaw dai na maga hkying 5:00pm aten daram hta Myitkyina maga na rawt wa ai Jet nbungli 2 hte bawm 4 lang wa jahkrat bun ai lam, ginra shiga lawk kaw na chye lu ai.
Dai ni gasat poi byin ai shara kaw August shata praw 10 ya shani hta mung, SNA Pyi Tu Tsit hpyen n-gun (50) daram hte KIA ni gasat poi byin ai re.
KIO ginjaw ginra, Nam San Yang hpyen man maga de mung, August shata 11 ya shani hta Katsu Dabak kaw nna, gumshem Myen hpyen dap bai shamu shamawt sa wa ai lam, ginra masha ni kaw na chye lu ai.
