Hpakant ginra de nbungli hte gap gasat nga

Hpakant ginra de gumshem Myen hpyen dap ni nbungli hte gap gasat ai lam galaw nga ai hpe chye lu ai.

April shata 13 ya shani hkying 1:00pm aten hte hkying 3:30pm aten laman, Hpakant Mashi Kahtawng hte Sut Bum grup yin de gumshem Myen hpyen dap ni nbungli hte numdaw (4) lang, bawm wa jahkrat gap gasat ai lam, ginra masha ni tsun ai.

Gumshem Myen hpyen dap ni April shata 11 ya shani kaw nna, Hpakant ginra de shani shagu bawm wa jahkrat gap gasat ai gaw, dai ni hte rai yang (4) ya rai sai lam, ginra masha ni matut tsun ai.

Hpakant ginra hta April shata praw kawn, gasat gala majan matut manoi ngu na byin nga ai hta gumshem Myen hpyen dap ni gaw ya na zawn, nbungli hte shani shagu ngu na wa gap gasat ai lam galaw nga ai sha n-ga, lagaw lam hku nna mung htu shadut ai lam galaw nga ai majaw, lahkawng maga hpyen masa shaja hkat nga ding yang re ai hpe chye lu ai.