KIA Masat (11) Dap Ba ginra gasat gala majan byin nga

KIA Masat (11) Dap Ba ginra hta KIA hte gumshem Myen hpyen dap ni gasat gala majan byin nga ai lam chye lu ai.

May shata 12 ya shani kaw nna, KIA Masat (11) Dap Ba ginra rai nga ai, Nga-U hte Mabing grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, shawnglam lit nga ai salang ni tsun ai.

Gumshem Myen hpyen dap ni gaw, KIA pawng hpawm hpyen hpung ni nga ai shara de drone, laknak kaba ni hte gap gasat nna lagaw lam hku nna mung htu shadut wa ai majaw, gasat gala majan byin wa ai rai nna, ya aten lahkawng maga hpyen masa shaja hkat nga ding yang re ai hpe chye lu ai.

Ya aten KIA Masat (2, 3, 5, 9, 11) Dap Ba ginra ni hta gumshem Myen hpyen dap ni gaw, hpyen n-gun kaba hte htu shadut jat bang nga ding yang re ai majaw, KIA pawng hpawm hpyen hpung ni hte gasat gala majan laja lana byin nga ai hpe chye lu ai.