Mawmau Kaji mare hpe Myen hpyen dap ni wan nat jahten
Hpakant Mawmau kaji mare hpe gumshem Myen hpyen dap ni wan nat jahten kau ya ai lam chye lu ai.
May shata 20 ya jahpawt hkying 2:00am aten daram hta Hpakant Mawmau kaji mare na mungshawa dum nta ni hpe gumshem Myen hpyen dap ni wan nat jahten kau ya ai lam, ginra masha ni tsun ai.
Wan nat jahten hkrum ai hta dum nta kade lawm mat ai lam nchye lu ai, dai de gaw gumshem Myen hpyen dap hte P.T.Ts pawng hpawm hpyen hpung ni sha nga ai, mungshawa ni sa yu na ngu tim nsa shangun ai re lam, ginra masha ni matut tsun ai.
Mawmau kaji mare kata gumshem Myen hpyen dap hte P.T.Ts pawng hpawm hpyen hpung ni gaw, mungshawa ni a manu dan ai arung arai ni hpe shanhte ra ai hku mya lu mya la ngut ai hpang, ya na zawn wan nat jahten ai lam ni galaw nga ai re hpe chye lu ai.
Ya aten Mawmau kaji mare na mungshawa ni gaw gasat gala majan a majaw, tinang shimlum dum ai shara ni hkan hpyen hprawng koi yen hkawm nga ai aten, gumshem Myen hpyen dap ni ya na zawn wan nat jahten ai lam ni galaw nga ai hpe chye lu ai.
