Mungmyit Ginwang kata gasat gala majan byin
Mungmyit Sinli Ga (Kachin Sub-state) KIA Masat (4) Dap Ba, Masat (34) Dap Dung ginra hta gasat gala majan byin nga ai lam chye lu ai.
August shata 11 ya shani kaw nna, Masat (34) Dap Dung ginra kata KIA pawng hpawm hpyen hpung ni shara la nga ai de, gumshem Myen hpyen dap ni htu shadut wa ai majaw, gasat gala majan byin wa ai re lam, lit nga ai salang ni tsun ai.
Gasat gala majan byin nga ai hta gumshem Myen hpyen dap ni nbungli hte wa gap gasat ai lam galaw nga ai rai nna, August shata 12 ya shani hta mung nbungli hte bai wa gap gasat ai re lam chye lu ai.
Mungmyit Ginwang kata ya aten, KIA pawng hpawm hpyen hpung ni hte gumshem Myen hpyen dap ni, lahkawng maga hpyen masa shaja hkat nga ai rai nna, lawnglam hkum zup hpe matut sagawn nga ding yang re.
Shwegu, Hkawnglam Hpu, Hpakant, Waimaw hte Manmaw ginra ni hta mung, gumshem Myen hpyen dap ni hpyen n-gun htu shadut jat bang ai lam ni ding yang galaw nga ai majaw, gasat gala majan shani shagu ngu na matut byin nga ai hpe chye lu ai.
