Sarawun lakmat shagrau hpawng galaw
Wunpawng Mungdan Shanglawt Asuya, Mungdan Hkamja Dap kaw nna woi awn galaw ai, pang (9) sarawun lakmat shagrau hpawng hpe July shata 11 ya jahpawt hkying 9:00am aten, Laiza Muklum kaw galaw la lu sai re.
Hpawng hta lakmat shagrau hkamla sai sarawun ni hpe KIC Amu Madu Du Kaba Lahpai Sing Hkaw kaw nna shatsam mungga jaw ai hta
“Ta tut bungli kaw tsawra myit lawm na galaw sa wa ra na re, machyi makaw hkrum taw ai ni hpe matsan dum ai hte tsawra ai myit hte shawang myit hte shakut mat wa ai shaloi, lani mi na a tsawra myit a ntsa e apu pu, asi si ai nang bai hkamsha lu na re, yakhkak dut dang ai lam ni nga na re, wa u tik hkam sharang nna shakut sa wa ga” nga nna tsun ai.
Pang (9) sarawun jawng yu sai jawngma yawng marai (43) rai nna, saw shaga da ai Magam Dap, Makan Dap hkan na myit su du salang ni, nawku hpung woi sara ni hte jawngma kanu kawa ni yawng marai 200 jan sa du shanglawm ai hte galaw la lu sai lam chye lu ai.
