Shwegu Muklum kata nga mungshawa ni yawng hprawng yen na hte lam nmaw kaba pat na lam KIA ndau
KIA Masat (11) Dap Ba, Masat (12) Dap Dung, Shwegu Muklum kata nga mungshawa ni yawng hprawng yen na hte lam nmaw kaba pat na lam, KIA ndau da ai hpe chye lu ai.
June shata praw 8 ya shani kaw nna, Shwegu Muklum kata nga ai mungshawa ni yawng hprawng yen na hte Shwegu Muklum numshang lam, Nga-Oo hte Shwegu lam nmaw kaba hpe KIA kaw nna nhtoi masat ai lam nnga pat kau sai lam, Masat (12) Dap Dung ni ndau laika shapraw da ai re.
Ndai zawn pat hkum da ai kaw lam nmaw kaba ntsa hkawmsa hkawmwa galaw ai mungshawa ni hte hprawng yen na matu ndau da ai kaw nhprawng yen ai sha, Muklum kata naw nga nga ai mungshawa ni hta hpang byin wa ai manghkang ni yawng hpe KIO, KIA kaw nna tsep kawp lit nla ya lu ai lam, ndau laika kaw na chye lu ai.
Shwegu ginra hta gaw KIA pawng hpawm hpyen hpung ni hte gumshem Myen hpyen dap ni shani shagu ngu na gasat gala majan byin nga ai sha n-ga, gumshem Myen hpyen dap maga kawn hpyen n-gun htu shadut ai lam ni ding yang galaw nga ai majaw, gasat gala majan matut manoi byin wa mai ai lam chye lu ai.
