61 ning hpring rawt malan masat ninghtoi Golf ginsup shingjang poi lamang galaw

61 ning hpring rawt malan masat ninghtoi golf ginsup shingjawng poi hpe February shata praw 3 ya jahpawt hkying 8:30am aten hta Laiza golf pa kaw galaw ai lam chye lu ai.

Ginsup shingjawng poi hta magam dap makan dap shara shagu na magam gun ni hte mung shawa golf ginsup ninghkring ni sa du ginsup shang lawm ai rai nna, KIO, KIA ningbaw kaba mung ginsup shang lawm ai lam chye lu ai.

Jinghpaw Wunpawng amyu ni dip sha hkrum ai kaw na lawt lu na matu, laknak lang rawt malan wa ai masat nhtoi rai nga mali ai. Ndai masat nhtoi hpe shagrau sha-a ai hku nna, n gun la ai hku nna mung, 61 ning hpring nna, 62 ning de lahkam wa na, ndai lahkam sa wa ai hta grau nna n gun awai lu u ga, anhte yawng gaw lahkrip ra ra rai nna anhte ra sharawng ai lu la hkra, awng dang hkra, n gun langai myit mang langai hte galaw sa wa na, dai hpe myit mada na galaw ai lam re nga nna, ningbaw kaba hpawng hpaw shatsam mungga kaw tsun ai.

Golf shingjawng gasup poi hpe lahkawng ya ginsup na rai nna, Laiza muklum kata hta lawk hte lawk, magam dap makan dap shagu na ginsup ninghkring ni, gaw din (futsal), ta din, U mun gayet, lagat shingjawng poi ni hpe ginsup ai lam chye lu ai.

Ya na zawn ginsup shingjawng ai hta ningtawn masat lu ai ginsup ninghkring ni hpe February shata praw 5 ya shani kumhpa jaw shagrau sha-a ai lamang hpe galaw na re lam chye lu ai.