EEDY NEWS News and Development
KIA Masat (9) Dap Ba, Masat (44) Dap Dung ginra hta hpyen shamu shamawt hkawm ai, gumshem Myen hpyen ni hte KIA, PDF pawng hpawng hpyen hpung ni, February shata praw 4 ya jahpawt hkying 7:40am aten daram kaw nna, Seng Hpra Mare shingdu Mai Sak sun kawng kaw gasat poi byin ai lam chye lu ai.
Gumshem Myen Hpyen Dap, Dapnu (33) kata na hpyen n gun (100) daram gaw, Nam Ya Hpyen Dap kaw na pru wa ai hpang, February shata praw 3 ya shana hkying 6:00pm aten hta Manaw Maw mare makau kaw KIA hte PDF pawng hpawm hpyen hpung ni hte gasat poi byin ai lam, buga masha ni tsun ai kaw na chye lu ai.
Nam Ya Mare kaw dap jung ai gumshem Myen hpyen ni gaw gasat poi byin ai shara de February shata praw 3 ya shana hkying 7:40pm aten daram kaw nna sinat kaba hte gap bun ai lam chye lu ai.
Gasat poi byin ai hte gumshem Myen hpyen ni gaw nbungli hte bawm jahkrat ai lam galaw ai majaw, mungshawa ni hkrit tsang nna ya aten Manaw mare, Kumtsai mare, Gawlu Yang mare hte Hkrai Run mare hkan na ni, Seng Hpra mare nawku jawng wang hte Jinghku jing-yu ni a nta hkan gan hprawng koi yen nga ai lam na chye lu ai.
February shata praw 3 ya shani hta mung, KIA Masat (1) Dap Ba, Masat (7) Dap Dung ginra, Sumpyi Yang mare kaw gumshem Myen hpyen ni Jet Fighter nbung li hte bawm wa jahkrat ai majaw, dum nta nkau hten za mat ai sha n ga mungmasha nkau mung si, hkala hkrum ai lam, ginra shiga lawk kaw na chye lu ai.
