Bumre Bum gumshem Myen hpyen dap hpe KIA pawng hpawm hpyen hpung ni padang dip zing la

KIO ginjaw ginra, Bumre Bum kaw dap jung shara jahkrat nga ai, gumshem Myen hpyen dap Ts.K.Hk (21) a, ahkyak ai hpyen dap kaba hpe, March shata 15 ya shani KIA pawng hpawm hpyen hpung ni padang dip zingla lu sai lam chye lu ai.

Gasat poi byin ai shara makau grup yin ni hta gumshem Myen hpyen dap a, Y-12 nbungli gaw, hkying hkum hku pyen gayin shing grup ngut ai hpang, Jet nbung li kaw nna bawm bai wa jahkrat bun ai re.

March shata praw 7 ya shani kaw nna, Manmaw, Laiza hte Myitkyina modo lam mayan hta dap dung shara la nga ai gumshem Myen hpyen dap hpe KIA, AA, hte pawng hpawm hpyen hpung ni htim gasat ai hta tai hpyen dap hpe law law padang dip gasat zing la lu sai re hpe chye lu ai.

Bumre Bum hpyen dap hpe lai wa sai 2012 ning December shata hta KIA ni gan yen da ai hpe 2024 ning March shata 15 ya shani hta bai padang dip zing la lu sai re.

KIA Masat (1) Dap Ba, Masat (10) Dap Dung ginra, Sumpra Bum kaw dap jung shara jahkrat nga ai gumshem Myen hpyen dap Hk.L.Y (46) dap hpe, March shata 14 ya shani kaw nna, KIA, PDF pawng hpawm hpyen hpung ni gasat nga ding yang re lam, shawng lam na lit nga ai salang ni kaw na chye lu ai.