Gumshem Myen hpyen dap hte KIA pawng hpawm hpyen hpung ni, gasat gala majan byin

Gumshem Myen hpyen dap hte KIA pawng hpawm hpyen hpung ni, May shata praw 3 ya jahpawt hkying 6:30am aten daram kaw nna, KIA Masat (1) Dap Nawng Daju ginra, Kagam Bum hte Gidon Bum mayan kaw ang katut gasat poi byin ai lam chye lu ai.

Gumshem Myen hpyen dap a, hpyen gasat nbungli (1) mung, Kagam hte Nhkram maga sa pyen gawai du da nhtawm, bawm jahkrat ai lam gaw nnga ai sha, bai nhtang wa mat ai lam, shawng lam na lit nga ai salang ni kaw na chye lu ai.

Ya aten hta Myitkyina modo lam Katsu Yang, Kagam Bum, Nhkram Bum, Gidon Bum hte Sama Bum ni hta dap jung shara jahkrat nga ai gumshem Myen hpyen dap hte KIA pawng hpawm hpyen hpung ni, hpyen masa shaja hkat nga ding yang re lam chye lu ai.

Sinpraw Ginwang Ginjaw, KIA Masat (3) Dap Ba ginra, Manmaw Nmawk hte Manje ginra ni hta mung, gumshem Myen hpyen ni hte KIA pawng hpawm hpyen hpung ni hpyen masa shaja hkat nga ding yang re lam matut chye lu ai.