EEDY NEWS News and Development
KIA Masat (1) Dap Nawng Daju ginra hta dap jung shara jahkrat nga ai, gumshem Myen hpyen dap hpe, May shata praw 4 ya shana maga hkying 3:30pm aten hta KIA pawng hpawm hpyen hpung ni htim gasat nga sai lam, shawng lam na lit nga ai salang ni kaw na chye lu ai.
Dai gumshem Myen hpyen dap ni gaw, Kagam, Nhkram, Gidon hte Sama Bum shara ni hta dap jung nga ai, tai gumshem Myen hpyen dap ni hpe aten langai hta sha, htim gasat ai re lam chye lu ai.
Gasat gala majan byin ai shara de, Myitkyina maga na Jet Fighter (2) hte numdaw lahkawng lang bawm wa jahkrat gap gasat da ai lam nga ai re.
Kagam, Nhkram hte Gidon shara ni hta May shata praw 3 ya shani kaw nna, KIA pawng hpawm hpyen hpung ni hte gumshem Myen hpyen dap ni gasat poi byin nga sai hpe mung chye lu ai.
Ya aten hta KIA Masat (1) Dap Ba, Masat (3) Dap Ba, Masat (5) Dap Ba Masat (3) Dap Dung ginra hte Masat (1) Dap Nawng Dap Dung ginra ni hta gumshem Myen hpyen dap ni hte KIA pawng hpawm hpyen hpung ni hpyen masa shaja hkat nga ding yang re majaw, gasat gala majan gaw matut laja wa mai ai lam, hpyen masa masam maram salang ni tsun ai kaw na chye lu ai.
KIA Masat (9) Dap Ba ginra, Hpakant Dapnu (Tatma) kawng kaw nga ai gumshem Myen hpyen ni May shata praw 4 ya shana maga hkying 4:00pm aten daram hta Seng Tawng mare makau grup yin shara de, laknak kaba hkrup mara gap bun ai majaw, mungshawa hkra hkala ai sha n-ga, dum nta hte company modo ni hten mat ai lam, buga masha ni tsun ai kaw na chye lu ai.
