Gumshem Myen hpyen dap ni mungshawa arung arai mya lu mya la nga

Hpakant ginra hta gumshem Myen hpyen dap ni mungshawa ni a arung arai ni hpe mya lu mya la nga ai hte mungshawa nkau mi hpe rim woi mat wa ai lam ni nga ai hpe chye lu ai.

January shata praw 9 ya shana daw hkying 5:45pm aten daram hta Hpakant Tatma Kawng kaw nga ai, gumshem Myen hpyen dap Hk.L.Y (76) dap hte laksan gumshem Myen hpyen dap Masat (30) dap na pawng hpawm hpyen n-gun (15) daram, mado kaji (3) hte sa wa nna, Mashi Kahtawng mare lawk (C) kaw nga ai, Hka Hku Computer (Htang Dip Kawng) seng kaw na Computer (2), Phone (2) hte gumhpraw nkau mi la mat wa ya ai lam, ginra masha ni kaw na chye lu ai.

Matut nna seng kaw bungli galaw nga ai, Shd. Tingba Ja Dan Awng asak 22 ning hte Shd. Doi Awng asak 17 ning re yan hpe Tatma Kawng de rim woi mat wa ai rai nna, seng kata nga ai arung arai ni hpe mung jahten kau da ya ai lam, ginra masha matut tsun  ai.

Hpakant ginra hta ndai zawn gumshem Myen hpyen dap ni shanhte ra ai hku mya lu mya la nga ai sha n-ga, gasat gala majan byin ai a majaw mungshawa ni hpyen koi yen nga ai re lam chye lu ai.