Gumshem Myen hpyen dap shara (3) hpe KIA pawng hpawm hpyen hpung ni gasat zing la

KIA Masat (3) Dap Ba ginra, Sinlum Bum gumshem Myen hpyen dap kaba a, makau grup yin shara ni hta dap jung da ai, Dumbau Bum hpyen dap, Loi Ying hpyen dap hte Ting Rawng hpyen dap shara (3) hpe March shata 30 ya shani KIA pawng hpawm hpyen hpung ni matut gasat zing la lu sai lam na chye lu ai.

Gasat poi laja lana byin nga ai shara de, gumshem Myen hpyen dap ni gaw, Jet nbungli hte Y-8, Y-12 nbungli kaw nna, nsin nhtoi bawm jahkrat bun nga ding yang re lam, shawng lam lit nga salang ni kaw na chye lu ai.

Matut nna, Sinlum gumshem Myen hpyen dap kaba, Byeng Wai hpyen dap hte Hpawlam Pyin Yang hpyen dap ni hpe mung, KIA pawng hpawm hpyen hpung ni laknak kaba ni hte gap gasat nga ding yang re lam chye lu ai.

KIA Masat (3) Dap Ba ginra, Loi Je, Nmawk modo lam mayan hta dap jung nga ai, gumshem Myen hpyen dap ni hpe, March shata 27 ya shani kaw nna, KIA pawng hpawm hpyen hpung ni htim gasat ai hta gumshem Myen hpyen dap shara (10) jan hpe gasat zing la lu sai re.