Hpakant, Mawbung mare na mungmasha ni hpe gumshem Myen hpyen ni rim woi mat

Hpakant, Mawbung mare de gumshem Myen hpyen dap ni April shata 21 ya jahpawt hta htu shang wa nna, Mawbung mare na mungmasha ni hpe rim woi nhtawm, dum nta hpe mung wan nat kau ya ai lam na chye lu ai.

Gumshem Myen hpyen dap ni gaw, Nam Ya kaw na lung wa ai Mawbung, Maden Yang mare na mungmasha yawng marai 100 daram hpe rim woi mat nna, nta lahkawng hpe mung nat kau ya ai majaw, mare masha ni grai hkrit tsang taw nga ai lam chye lu ai.

Gasat gala majan byin ai lam nnga ai sha, gumshem Myen hpyen dap ni gaw, Maden Yang mare kata shang nhtawm, mungmasha ni hpe mara kata adup gayet nna shanhte a ninggang shatai let shang rim woi mat ai. Dai rim woi mat ai mungmasha ni hpe Ginsi maga de woi mat ai lam ginra masha ni tsun ai.

Lai wa sai April shata 18 ya shani hta mung, gumshem Myen hpyen dap ni Seng Hpra mare na mungmasha ni hpe ninggang shatai nna, rim woi mat ai kaw KIA hpyen hpung ni hte ang katut nna, modo (2) hpe hkap gap gasat ai kaw mungmasha langai si sum nna, marai 6 hkala hkrum ai lam mung byin lai sai re.

Hpakant byuhakung hta nga ai gumshem Myen hpyen dap ni mung, sinat kaba hte hkrup mara gap shadam taw ai majaw mungmasha ni hkrit tsang nga ai lam Hpakant ginra masha ni kaw na chye lu ai.