Hpakant ginra hta gasat gala majan laja nga

Hpakant, KIA Masat (9) Dap Ba, Masat (6) Dap Dung, Tamahkan ginra hta gasat gala majan laja nga ai lam chye lu ai.

March shata praw 3 ya jahpawt hkying 7:00am aten daram hta Nammaw Hpri Bum kaw na, gumshem Myen hpyen dap n-gun (80) grup yin, Tamahkan majan de hpyen garum sa wa ai hpe KIA hpyen hpung ni, Namsaping mare kaw hkap gasat ai kaw na gasat gala majan byin wa ai lam, lit nga ai salang langai tsun ai.

Hkying 8:30am aten daram hta hpyen garaum sa wa ai gumshem Myen hpyen hpung ni, Tamahkan mare kata du shang wa nna, Tamahkan mare lawk-3 na dum nta ni hpe wan hkan nat nga ai lam, salang wa matut tsun ai.

Ya na zawn gumshem Myen hpyen dap ni wan nat nga ai majaw, Tamahkan mare ting wan hkru nga sai hte ya aten hpyen mara gara hku naw byin nga ai lawng lam hkum zup hpe matut sagawn nga ai re.

Tamahkan gumshem Myen hpyen dap hpe KIA pawng hpawm hpyen hpung ni lai wa sai February shata 26 shani kaw na htim gasat nga ai hta Myen balik dap hpe gasat zing la lu sai rai nna, Tamahkan gumshem Myen hpyen dap hpe matut naw htim gasat nga ai lam chye lu ai.

Ya aten Tamahkan ginra hta KIA hte gumshem Myen hpyen dap lapran gasat gala majan laja nga ai rai nna, KIA ni htim gasat nga ai ten gumshem Myen hpyen dap nbungli hte bawm wa jahkrat garum ai lam ni nga ai hpe matut chye lu ai.