KIA Dap Ba ( 2 ) hte Dap Ba ( 6 ) ginra ni hta gasat majan byin

July praw, 5 ya shani KIA Dap Ba ( 2 ) hte Mungmyit Sinli Ga ( Kachin Sup-State ) Dap Ba ( 6 ) ginra ni hta shamu shamawt nga ai, Myen hpyen hpung hte KIA ni gasat gala majan byin ai lam chye lu ai.

Sinna Ginwang Ginjaw, KIA Dap Ba ( 2 ), Dap Dung ( 6 ) ginra Marim hkauna pa kaw mani hpawt hkying 8:20am aten hta Hk.L.Y ( 251 ) dap na hpyen n-gun ( 40 ) daram hte KIA hpyen hpung ni gasat majan numdaw mi byin nna, shana maga hkying 3:00pm aten, U Tawng Bum kaw mung, gasat majan byin ai lam, ginra shisawk ni kawn chye lu ai.

Bai, KIA Dap Ba ( 6 ), Dap Dung ( 2 ) ginra, Nawng Jawng mare hte Man Nawng lam lapran hta mung, shana daw hkying 2:00pm aten Hk.M.Y ( 367 ) dap na hpyen n-gun ( 60 ) daram hte KIA hpyen hpung ni, minute 30 daram gasat gala majan byin ai lam chye lu ai.