Kahtawng ( 4 ) na mare salang ni hpe, Myen hpyen ni zuphpawng woi galaw nga

KIA Dap Ba ( 5 ) Dap Dung ( 18 ) ginra, Man Pang, Hkawk Jang, Hka U, Ja Ing Yang kahtawng 4 na mare salang ni hpe, Shadan Pa Byuha Kawng kaw nga ai Myen hpyen ni kawn, zuphpawng woi galaw nga ai lam na chye lu ai.

Dai zuphpawng hta tsun ai gaw, “Bat hpang 5 ya shani shagu jahpawt hkying 9:00am, hkying 10:00am aten laman hta zuphpawng ding yang galaw sa wa na hte KIA ni shamu shamawt lam hpe ding yang shiga jaw na, mare shinggan pru hkawm na rai yang shiga jaw” ngu tsun ai lam, buga masha ni kawn chye lu ai.

Laiwa sai June 23 ya shani hta mung, Ja Ing Yang mare salang yan hpe shaga la nna, zuphpawng woi galaw ai hta Myen hpyen ni Ja Ing Yang mare hku laiwa laisa galaw na matu hpyi shawn ai hpe, mare salang yan gaw shimlam hte seng nna anhte lit nlu la ya ai ngu tsun ai lam hpe na chye lu ai.