KIA hte gumshem Myen hpyen dap lapran gasat gala majan matut byin

KIA Masat (2) Dap Ba, Masat (11) Dap Dung ginra, Myitkyina Ginwang, Mu Gawng 8-Mile kaw, gumshem Myen hpyen dap hte KIA ni gasat gala majan byin ai lam chye lu ai.

February shata 27 ya jahpawt hkying 8:30am aten daram hta Mu Gawng kawn rawt wa ai, gumshem Myen hpyen dap Hk.L.Y (74) n-gun (50) hpung hte Man Yawt P.T.Ts n-gun (70) pawng hpawm hpyen hpung ni hpe KIA ni Mu Gawng 8-Mile lam mazup kaw bawm hkap kapaw bun ai kaw nna, gasat gala majan byin wa ai lam, lit nga ai salang ni kaw na chye lu ai.

Matut nna KIA Masat (3) Dap Ba, Masat (12) Dap Dung ginra hta mung, KIA ni hkap nga Tantada mare makau kaw, gumshem Myen hpyen Hk.L.Y (13) dap ni gale pru wa ai hpe KIA ni hkap gap ai kawn, gasat gala majan byin wa ai lam matut chye lu ai.

Gasat gala majan byin nga ai ten shana maga hkying 5:45pm aten daram hta gumshem Myen hpyen dap Jet Fighter (1) hte Tantada mare makau kaw bawm wa jahkrat bun ai lam chye lu ai.

Shana maga hkying 6:00pm aten daram hta mung, gumshem Myen hpyen dap AMT (352) dap kaw nna, Chyauk Tung Gyi maga de 81mm (5) lang gap shadam bun ai lam chye lu ai.