EEDY NEWS News and Development
Manmaw, Myitkyina maga na KIO ginjaw Laiza maga de, hpyen n-gun law law hte shamu shamawt shang wa ai gumshem Myen hpyen dap, Pyi Tu Tsit pawng hpawm hpyen hpung ni hte KIA ni, August shata 30 ya shani gasat gala majan matut byin nga ai re.
KIA Masat (1) Dap Nawng Daju ginra, Sama lam numshe hte Ja Pu lapran kaw August shata 30 ya shana daw hkying 2:00pm aten hta Myitkyina maga de na sa wa ai, gumshem Myen hpyen dap hte Shwe Min woi awn ai Pyi Tu Tsit pawng hpawm hpyen n-gun (100) jan hte KIA ni laja lana gasat poi byin ai lam chye lu ai.
Gasat poi byin ai maga de, Hkatsu kaw nga ai gumshem Myen hpyen ni laknak kaba hte gap bun ai. Hka Ya Bum kaw nga ai gumshem Myen hpyen ni mung, Mai Sak Pa hte Woi Chyai Bum maga de laknak kaba gap bun ai lam, ginra masha ni kaw na chye lu ai.
Manmaw maga de na, Nam San Yang hpyen man de shamu shamawt lung wa ai gumshem Myen hpyen ni mung, Auguts shata 30 ya shani hta Numlang hpyen dap kaw nna, lagaw lam hku shimlam la lung wa ai ten, shanhte hkrai sinat gap shangoi nhtawm lung wa ai hpang, Numlang hte Uhtang Yang lapran kaw KIA ni bawm hte hkap gap gasat ai hta Myen hpyen maga si hkala yawng marai (20) daram nga ai lam, shawng lam lit nga ai salang ni kaw na chye lu ai.
KIA Masat (3) Dap Ba, Masat (12) Dap Dung ginra hta mung, August shata 29 ya shani, In Dayan mare, Sin Bing mare hte Noi Ni Ai makau kaw gumsshem Myen hpyen dap hte KIA ni gasat poi byin ai re.
Ya aten Manmaw, Myitkyina maga de na gumshem Myen hpyen dap hte Pyi Tu Tsit pawng hpawm hpyen ni n-gun jat nga dingyang re majaw, gasat gala majan matut byin wa mai ai lam, shawng lam na lit nga ai salang ni tsun ai kaw na chye lu ai.
