Manmaw maga de na lung wa ai gumshem Myen hpyen modo hpung ni hpe KIA ni hkap gap gasat

Manmaw maga de na KIO ginjaw ginra, Nam San Yang hpyen man de, hpyen lang arung arai hte malu masha htaw nna lung wa ai modo hpung ni hpe September shata praw 9 ya shana hkying 7:15pm aten daram hta Hkala Kadawng kaw, ding gren nga ai modo ni hpe KIA ni hkap gap gasat ai lam chye lu ai.

Dai hpang, Hkang Kai Bum, Hpun Pyen Bum hte Bumre, Hka Ya Bum kaw nga ai gumshem Myen hpyen dap ni Laiza makau grup yin shara ni de, laknak kaba hkrup mara gap bun ai lam nga ai.

Dai shana hta sha, Dawhpum, Hkang Kai Bum kaw nga ai gumshem Myen hpyen dap ni gap dat ai sinat kaba pala langai Dawhpum Yang laika sharin jawng wang kaw wa hkrat kapaw ai majaw, saranum marai lahkawng kaw hkala hkrum ai lam, ginra masha ni tsun ai kaw na chye lu ai.

Hkala hkrum ai saranum yan gaw, Daw Khin Than Wei hte Daw Aye Chan Phyu rai nna, ndai saranum yan gaw Non CDM yan re ai lam matut chye lu ai.

Dai ni September shata praw 10 ya jahpawt hkying 8:00am hte 9:00am aten laman hta mung, Hkala Kadawng kaw dinggren nga ai gumshem Myen hpyen modo hpung ni hpe KIA ni sinat kaba hte matut hkap gap gasat ai hta modo langai wan hkru hten mat ai lam, shawnglam na lit nga ai salang ni tsun ai kaw na chye lu ai.

Ndai modo hpung ni hpe September shata praw 6 ya shani hta mung, Dawhpum Yang lawu Loi Jaw kadawng kaw KIA ni hkap gap gasat dat ai re hpe mung chye lu ai.

၎

င

၎

၎