Sumpra Bum Myen dap hpe KIA ni padang dip la

KIA Masat (1) Dap Ba, Masat (10) Dap Dung ginra, Sumpra Bum gumshem Myen hpyen dap hpe KIA, KPDF hte KPF pawng hpawm hpyen hpung ni htim gasat zing madu la lu sai lam chye lu ai.

May shata praw 5 ya shani Sumpra Bum Hk.L.Y (46) gumshem Myen hpyen dap hpe KIA pawng hpawm hpyen hpung ni htim gasat zing madu la lu sai lam, lit nga ai salang ni kaw na chye lu ai.

Sumpra Bum gumshem Myen hpyen dap hpe KIA pawng hpawm hpyen hpung ni lai wa sai March shata 16 ya shani kaw na htim gasat hpang wa ai hta dai ni May shata praw 5 ya shani padang dip la lu ai lam chye lu ai.

Gasat gala majan byin nga ai ten gumshem Myen hpyen dap kaw nna, nbungli bawm, laknak kaba ni hte hkrup mara gap sharu bun ai lam nga ai hpe chye lu ai.

Matut nna KIA Masat (1) Dap Nawng Daju ginra kata na, Kagam, Pungling, Sama Kawng hte KIA Masat (5) Dap Ba kata na Masat (3) Dap Dung ginra, Ngagyang Bum na gumshem Myen hpyen dap shara ni hpe KIA pawng hpawm hpyen hpung ni htim gasat padang dip zingla lu sai rai nna, ngam nga ai shara ni hpe matut htim gasat nga ai lam chye lu ai.