Gumshem Myen hpyen dap ni, Nam San Yang hpyen man de, Jet nbungli 3 hte bawm wa jahkrat gasat
KIO ginjaw ginra, Nam San Yang mare hte Lailum Awng Ja mare mayan hta September shata 25 ya shana maga hkying 3:50pm aten daram hta gumshem Myen hpyen ni, Jet Fighter nbunli 3 hte bawm wa jahkrat gap gasat ai lam chye lu ai.
Lailum Awng Ja mare mayan hta up rawng nga ai gumshem Myen hpyen ni shamu shamawt pru wa ai majaw, dai hpawt hkying 5:00am aten daram hta gasat poi byin ai lam, shawng lam na lit nga ai salang ni kaw na chye lu ai.
Bumre, Hka Ya Bum kaw nga ai gumshem Myen hpyen ni, Nam San Yang hte Lailum Awng Ja maga de laknak kaba ding yang ngu na gap bun nga ai majaw, KIA ni mung Bumre, Hka Ya Bum maga de laknak kaba bai gap bun ai lam chye lu ai.
KIO ginjaw ginra, Manmaw, Myitkyina modo lam mayan Nam San Yang hte Madi Yang maga de, gumshem Myen hpyen dap ni lai wa sai July shata praw 3 ya shani kaw nna hpyen n-gun hkying lam hte htu shadut chyinglau shang wa ai majaw, KIA, pawng hpawm hpyen hpung ni hkap shingla gasat poi byin ai shata 2 jan nga sai re.
Ya aten hta mung hpyen masa shaja hkat nga ding yang re majaw gasat gala majan gaw, Myen hpyen dap ni htingnut mat ai lam nnga yang matut nna laja lana naw byin wa mai ai lam, shawng lam na lit nga ai salang ni tsun ai kaw na chye lu ai.
