Namting Myen hpyen dap hpe KIA ni gasat padang dip la
KIA Masat (9) Dap Ba kata na pawng hpawm hpyen hpung ni, Hpakant lam Namting gumshem Myen hpyen dap hpe gasat padang dip la lu sai lam na chye lu ai.
February shata praw 2 ya shana maga hkying 4:00pm aten daram kaw na htim gasat nga ai rai nna, dai ni February shata praw 3 ya jahpawt hkying 6:00am aten kaw na numdaw kalang bai htim gasat ai hta hkying 11:15am aten daram hta padang dip gasat zing la lu sai lam, lit nga ai salang langai tsun ai.
Namting gumshem Myen hpyen dap gaw Tatma 33 kata na hpyen hpung ni rai nna, KIA ni htim gasat nga ai ten Hpakant Byuha kawng kaw na laknak kaba (10) jan lang gap bun nna, Jet Fighter hte mung bawm wa jahkrat bun ai lam, salang wa matut tsun ai.
February shata praw 2 ya shani hta mung, KIA Masat (5) Dap Ba ginra, Katsu kawn Dabak hkran maga de shamu shamawt htu shadut shang wa ai, gumshem Myen hpyen hpung ni hte KIA ni gasat gala majan byin ai lam matut chye lu ai.
