Laknak kaba si wa hkrat kapaw ai majaw, mungshawa si sum
Hpakant ginra kata gumshem Myen hpyen dap ni laknak kaba hkrup mara gap shadam bun ai majaw, mungshawa asak si sum ai lam chye lu ai.
April shata 23 ya shana hkying 10:00pm aten daram hta Hpakant Tatma kawng kaw na gumshem Myen hpyen dap ni gap dat ai laknak kaba si, Namhpyit Catholic hpyen yen camp kaw wa hkrat kapaw ai majaw nawku jawng, jawng sin a kasha asak si sum mat nna, mungshawa marai langai mung hkala hkrum ai lam, ginra masha ni tsun ai.
Hpyen yen camp grup yin hta gasat gala majan byin ai lam mung nnga ai, gumshem Myen hpyen dap ni ya na zawn laknak kaba hte gap gasat ai lam gaw, mungshawa ni hpe gap masat tawn na gap gasat nga ai re lam, ginra masha ni matut tsun ai.
Hpakant ginra hta gumshem Myen hpyen dap ni gaw, gasat gala majan nbyin ai aten hkan raitim, mungshawa ni nga ai shara hkan laknak kaba ni hte hkrup mara gap gasat ai lam ni galaw nga ai rai nna, mungshawa ni hpe mara kata gap sat ai lam, rim woi mat wa ai lam ni galaw nga ai majaw, dai ginra na mungshawa ni hkrit tsang let sha hkawmsa nga ra ai lam chye lu ai.
