Ginjaw Ginra makau grup yin hta gasat gala majan matut manoi byin nga ai sha n-ga, Myen hpyen dap ni nbungli bawm ding yang wa jahkrat bun nga
Ginjaw Ginra makau grup yin hta KIA hte gumshem Myen hpyen dap lapran gasat gala majan laja lana matut manoi byin nga ai hta Ginjaw Ginra de gumshem Myen hpyen dap ni nbungli bawm ding yang wa jahkrat bun nga ai lam chye lu ai.
March shata praw 7 ya shani kaw na Ginjaw Ginra makau grup yin, Waimaw Laiza, Manmaw Laiza lam kaba ntsa dap jung nga ai, gumshem Myen hpyen dap shara ni hpe KIA pawng hpawm hpyen hpung ni htim gasat hpang wa ai kaw nna, Ginjaw Ginra de nbungli bawm shani shagu wa jahkrat bun nga ai re.
Gumshem Myen hpyen dap ni shani shana nbungli hte wa gap bun nga ai majaw, mungshawa ni a dum nta nkau hten za hkrum ai hte Ginjaw Ginra makau grup yin kaw nga ai mungshawa ni shim lum ai shara hkan koi yen hkawm nga ra ai re.
KIA hte gumshem Myen hpyen dap lapran gasat gala majan lani hte lani grau grau laja wa nga ai hta gumshem Myen hpyen dap maga sum machyi ai lam law wa ai majaw, mungshawa ni nga ai shara de nbungli bawm laknak kaba ni hte hkrup mara gap shadam bun nga ai re lam chye lu ai.
Ya aten KIO Ginjaw Ginra hte Waimaw Laiza lam, Manmaw Laiza lam ntsa, dap jung nga ai gumshem Myen hpyen dap shara ni hpe KIA pawng hpawm hpyen hpung ni matut manoi htim gasat nga ai lam chye lu ai.
Gumshem Myen hpyen dap shara hte post nkau hpe KIA ni padang dip zing la lu sai rai nna, ngam nga ai dap shara ni hpe matut naw htim gasat nga ai hta lahkawng maga hpyen masa shaja hkat nga ding yang re hpe chye lu ai.
