SNA hte gumshem Myen hpyen dap shara nkau hpe KIA matut zing
KIA Masat (9) Dap Ba, Sagaing jarit ginra kata dap jung nga ai, SNA dap hte gumshem Myen hpyen dap shara nkau hpe KIA ni matut zing madu la lu ai lam chye lu ai.
November shata 19 ya jahpawt hkying 5:00am aten daram hta Sagaing jarit, Sezin ginra kata dap jung nga ai, gumshem Myen hpyen dap n-pu, SNA (Sam hkyeng dap) hte gumshem Myen hpyen dap shara nkau hpe KIA pawng hpawm hpyen hpung ni matut zing madu la lu ai lam, lit nga ai salang ni kaw na chye lu ai.
Gasat gala majan byin ai hta gumshem Myen hpyen dap kawn, nbungli hte wa gap gasat ai lam ni galaw ai rai nna, laknak arung arai hte hpyen bawng masha ni hpe mung, KIA pawng hpawm hpyen hpung ni zing madu la lu ai lam chye lu ai.
Laiwa sai October shata 25 ya shani hta mung, Sezin ginra kata dap jung nga ai gumshem Myen hpyen dap shara nkau hpe KIA ni zing madu la lu sai rai nna, ya aten Tamahkan, Seng Tawng hte Sezin ginra ni hta gumshem Myen hpyen dap shara n nga sai lam matut chye lu ai.
