Immigration jawng yu hpawng galaw
Wunpawng Mungdan Shanglawt Asuya, Mungchying Uphkang Dap, Ginjaw Immigration Makan Dap kaw nna hpaw sharin ai, masat yan (16) Immigration jawng yu hpawng hpe June shata 10 ya jahpawt hkying 8:00am aten hta Myu Lawt Wunli Gawknu kaw galaw la lu sai lam chye lu ai.
Jawng yu hpawng hta Mungchying Uphkang Dap, DGA Ningtau Lit Hkam, Salang Kaba La Gawng Tawng Lar kaw nna jawng yu sai jawngma ni hpe shatsam mungga jaw ai hta
“Dai ni sharin ya ai gaw kachyi mi sha rai na re, anhte grai naw hka ja ra na re, bungli hpe hka ja na, ntsa tsang de na ga hpe madat na, rit kawp tara hkan sa na, mungshawa hte anhte atsawm sha ganawn mazum na tsun shaga na, magam bungli hta nshaw nshun nre ai sha ading sha ara sha rawt jat ai hku na galaw sa wa lu na matu, shakut shaja na lam hpe n-gun jaw dat ai lam rai sai” nga nna tsun ai.
Hpawng hta jawng yu sai jawngma ni hpe lakmat jaw ai lam, ningtawn ai jawngma ni hpe shagrau kum hpa jaw ai lam, hpaji tsang ningtawn ai hta hkan nna Lat Gyi, Gyi, Du Tau tsang aya ni hpe shakap ya ai re lam chye lu ai.
Jawng yu sai jawngma yawng marai (96) rai nna, saw shaga da ai Magam Dap, Makan Dap hkan na myitsu du salang ni, nawku hpung woi sara ni, jawngma kanu kawa ni sa du shang lawm ai hte galaw la lu sai re lam chye lu ai.
