Marang htu sawng nna Laiza muklum kata, hka tung kaba ai lam byin
Marang htu sawng nna Laiza muklum kata, hka tung kaba ai lam matut byin ai hpe chye lu ai.
August shata 11 ya jahpawt jau kawn marang matut manoi htu sawng ai majaw, Laiza hka, hka chyang hka hte hka ya hka ni tung kaba wa nna, muklum kata shani ka-ang aten daram du hkra hka tung kaba ai lam byin ai re.
Ndai zawn bum hka shi ni tung kaba wa ai majaw, hka makau kaw nga ai mungshawa ni a dum nta nkau hte gat seng nkau htenza mat ai rai nna, mawdaw lam ni hkan mung hka hkumpup ni hpring mat ai sha n-ga, gat dut hpaga galaw nga ai mungshawa nkau a simai simaw, namsi namsaw nkau mung yawng lawm mat ai lam chye lu ai.
Laiwa sai August shata praw 4 ya shani hta mung, marang htu sawng nna hka mawru wa ai majaw, Ginjaw Ginra grup yin hta nga ai mare kahtawng hte hpyen yen dabang hkan na dum nta law law htenza yawng lawm mat ai sha n-ga, mungshawa si hkala hkrum ai lam ni mung byin lai sai re.
