Manmaw ginra hta gasat gala majan laja lana matut byin nga
Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan laja lana matut byin nga ai lam chye lu ai.
December shata 28 ya shani du hkra, Manmaw ginra gasat gala majan laja lana matut byin nga ai hta Hk.LY (47) hte Manmaw dakkasu jawng makau mayan kaw grau nna majan laja nga ai lam, shawnglam lit nga ai salang ni shana wa ai kaw na chye lu ai.
Gumshem Myen hpyen dap ni gaw nbungli, drone ni hpe n-gun dat jai lang nna gap gasat nga ai rai nna, KIA pawng hpawm hpyen hpung ni mung htim gasat nga ding yang re ai lam chye lu ai.
Ndai zawn Manmaw ginra gasat gala majan laja nga ai aten, December shata 28 ya shana hkying 12:10am aten daram hta gasat gala majan byin ai lam nnga ai, Num Lang mare RCM nawku jawng wang kaw Jet nbungli (1) hte bawm (2) lang wa jahkrat bun ai lam, ginra masha ni kaw na chye lu ai.
Ya na zawn nbungli bawm wa jahkrat bun ai lam nga ai raitim, bawm n-awng mat ai majaw, hkra hkala hkrum ai lam hpa nnga ai hpe matut sagawn chye lu ai.
Gumshem Myen hpyen dap ni gaw ya aten, Jinghpaw mung kata gasat gala majan byin ai lam nnga ai shara hkan raitim, nbungli, drone, laknak kaba ni hte hkrup mara gap gasat ai lam ding yang galaw nga ai hpe chye lu ai.
