Pawng hpawm hkungran ga shaka la hpawng galaw
KIA Masat (1) Dap Ba ginra kata pawng hpawm hkungran ga shaka la akyu hpyi hpawng hpe galaw ai lam chye lu ai.
January shata 27 ya shani, Masat (1) Dap Ba Daju Komiti kata pawng hpawm hkungran ga shaka la akyu hpyi hpawng hpe N-gum La Muklum kaw galaw la lu sai lam, Dingdung Ginwang Ginjaw Komiti lit nga ai salang ni kaw na chye lu ai.
Hkungran ga shaka la akyu hpyi hpawng hta Dingdung Ginwang Ginjaw Komiti Amu Madu, Salang Kaba Grawngyang La Ja kaw na ya zawn tsun ai hta
“Htunghking lam ngut nna ri nhtu la da ngut, mung masa hpyen masa sat lawat mayak hte dinghkrai mayak lam amyu myu a majaw, hkungran ga shaka lakmat rai nlu la shi ai magam gun dinghku ni hpe pawng hpawm hkungran ga shaka la ya ai re” nga nna tsun ai.
Dai ni na pawng hpawm hkungran ga shaka la akyu hpyi hpawng hta magam gun dinghku htinggaw (16) hpe hkungran ga shaka lakmat la ya ai rai nna, hpawng hta Dingdung Ginwang Ginjaw dinggrin komiti salang ni, Magam Dap Makan Dap hkan na magam gun ni hte mare mungshawa ni sa du shanglawm ai hte galaw la lu sai lam chye lu ai.
