Hkam bawm gabye kapaw la ai majaw, mungshawa si hkala hkrum
Hpakant ginra hta hkam bawm gabye kapaw la ai majaw, mungshawa si hkala hkrum ai lam chye lu ai.
May shata praw 7 ya shani hkying 10:30am aten daram hta Hpakant Lawnghkang lam num braw kaw hkam tawn da ai, hkam bawm gabye kapaw la ai majaw, 2 ning re ma langai asak si sum mat nna, mungshawa marai 2 hkala hkrum ai lam, ginra masha ni tsun ai.
Ndai bawm gaw gumshem Myen hpyen dap ni hkam tawn da ai bawm rai nna, asak si sum mat ai ma gaw Lawnghkang na re, mungshawa marai 2 mung hkala hkrum ai lam, ginra masha ni matut tsun ai.
Hpakant ginra hta ya aten KIA pawng hpawm hpyen hpung ni hte gumshem Myen hpyen dap ni gasat gala majan matut manoi byin nga ai rai nna, gumshem Myen hpyen dap ni laknak kaba hkrup mara gap shadam bun ai lam ni galaw nga ai majaw, mungshawa si hkala hkrum ai lam jahkring hkring byin nga ai re.
Ndai zawn gasat gala majan byin nga ai hta Hpakant ginra kata gumshem Myen hpyen dap hte P.T.Ts pawng hpawm hpyen hpung ni mungshawa ni a, gumhpraw, lung seng, cycle, modo ni hpe shanhte ra ai hku mya lu mya la ai lam mung galaw nga ai nga nna, ginra masha ni tsun ai kaw na chye lu ai.
