Myen hpyen dap shara (3) hpe KIA zing

Hpakant ginra kata dap jung shara jahkrat nga ai gumshem Myen hpyen dap shara (3) hpe KIA pawng hpawm hpyen hpung ni gasat zing la lu ai lam chye lu ai.

April shata praw 2 ya shani na gasat gala majan hta Hpakant ginra Maw Wan Kaba mare phone tower kaw dap jung nga ai gumshem Myen hpyen dap, Nma Yang mare lup wa kawng dap hte Ntawng Naw Bum kaw dap jung nga ai gumshem Myen dap ni hpe KIA pawng hpawm hpyen hpung ni gasat zing madu la lu sai lam, shawnglam lit nga ai salang ni tsun ai.

Gumshem Myen hpyen dap ni shanhte a dap shara tat sum kau ai majaw, mani shani tup ngu na nbungli, laknak kaba ni hte laja lana gap gasat ai lam ni galaw ai hpe chye lu ai.

Ya gasat zing la lu ai dap shara ni gaw, laiwa sai 2025 ning htum wa maga de KIA pawng hpawm hpyen hpung ni gan yen kau da ai shara hpe bai htim gasat zing la lu ai re lam chye lu ai.