Laknak kaba si a majaw, mungshawa si hkala hkrum
Hpakant ginra hta gumshem Myen hpyen dap ni laknak kaba hkrup mara gap shadam bun ai majaw, mungshawa si hkala hkrum ai lam chye lu ai.
April shata 19 ya jahpawt hkying 4:00am aten daram kaw nna, Malang Dung mare de gumshem Myen hpyen dap ni hpyen n-gun htu shadut shang wa ai hta mare kata si nat hkrup mare gap dum bre hkawm ai majaw, asak (4) ning re hkang amyu sha ma langai asak si sum mat ai lam, ginra masha ni tsun ai.
Hkying 8:00am aten daram hta mung, gumshem Myen hpyen dap ni a drone bawm, Mawsiza mare kaw wa hkrat kapaw ai majaw mungshawa marai (3) hkra hkala hkrum ai lam, ginra masha ni matut tsun ai.
Gumshem Myen hpyen dap ni gaw ya aten, Malang Dung, Mashi Kahtawng, Namhpyit, Mawsiza ginra ni de hpyen n-gun htu shadut shamu shamawt hkawm nga ai majaw, lahkawng maga hpyen masa shaja hkat nga ding yang re ai hpe chye lu ai.
KIA Masat (2) Dap Ba, Masat (14) Dap Dung ginra hta mung, April shata 18 ya shani gasat gala majan byin ai kaw, Min Zay Thant P.T.Ts ni shara la nga ai dap shara (2) hpe KIA pawng hpawm hpyen hpung ni gasat zing madu la lu ai lam chye lu ai.
Ya aten KIA Masat (2, 9) Dap Ba ginra ni hta gumshem Myen hpyen dap hte P.T.Ts pawng hpawm hpyen hpung ni hpyen n-gun htu shadut ai lam ding yang galaw nga ai majaw, gasat gala majan laja lana matut byin wa mai ai lam chye lu ai.
