Hpakant ginra hta gasat gala majan matut byin nga
Hpakant ginra hta gumshem Myen hpyen dap pawng hpawng hpyen hpung ni hpyen n-gun htu shadut nga ai majaw, gasat gala majan matut byin nga ai hpe chye lu ai.
April shata 19 ya jahpawt hkying 8:30am aten daram hta Hpakant ginra de gumshem Myen hpyen dap hte Lisu P.T.Ts, Wa Ra Zup P.T.Ts pawng hpawm hpyen hpung ni hpyen n-gun htu shadut lung wa ai kaw, KIA pawng hpawm hpyen hpung ni, Mawsiza grup yin kaw hkap shingla gap gasat ai kawn, gasat gala majan byin wa ai re lam, lit nga ai salang ni tsun ai.
Gasat gala majan byin ai hta gumshem Myen hpyen dap maga, si hkala law ai rai nna, Lawnghkang hte Malang mare grup yin kaw mung gasat gala majan byin ai lam nga ai hta gumshem Myen hpyen dap maga si hkala law ai re lam chye lu ai.
Hpakant ginra hta gumshem Myen hpyen dap pawng hpawm hpyen hpung ni hpyen n-gun htu shadut shamu shamawt nga ai aten, Lawnghkang grup yin laiwa laisa mungshawa ni hpe mung, gumshem Myen hpyen dap pawng hpawm hpyen hpung ni kawn, shahkrit shama rim jep ai lam ni galaw nga ai nga nna, ginra masha ni tsun ai.
Ndai zawn rim jep ai lam galaw nga ai hta mungshawa ni a gumhpraw, lung seng, la chyawp hte phone ni hpe rim la kau ya ai sha n-ga, ntsen nhten ai mungshawa ni hpe mung, rim woi mat wa ai lam ni nga ai hpe chye lu ai.
Hpakant ginra hta gumshem Myen hpyen dap hte KIA pawng hpawm hpyen hpung ni April shata praw kawn, gasat gala majan laja lana bai byin wa ai rai nna, gumshem Myen hpyen dap maga mung, Hpakant ginra hpe jum tek lu na matu hpyen n-gun htu shadut ai lam ding yang galaw nga ai hpe chye lu ai.
