Masat (26) Dap Dung ginra hkawmsa hkawmwa lam pat na hpe KIA ndau
KIA Masat (9) Dap Ba, Masat (26) Dap Dung ginra kata hkawmsa hkawmwa lam pat na hpe KIA ndau da ai lam chye lu ai.
May shata 31 ya shani kaw nna, KIA Masat (26) Dap Dung ginra Hopin hte Chyawngwa, Hopin hte Nyawng Pin matut mahkai da ai lam kaba hpe aten n masat gan pat da na lam, Masat (26) Dap Dung ni ndau laika shapraw da ai re.
Ya aten hta hpyen masa, mung masa shuk shanut nga ai hta hkan nna tinang Dap Dung ginra kata hkrun lam hkawm mungchying mungshawa yawng, kunrai htaw shalai ai cycle, modo kaji kaba yawng hkawmsa hkawmwa lam ni hpe aten n masat gan pat hkum dat ai re lam chye lu ai.
KIA Masat (9) Dap Ba ginra hta gaw, gasat gala majan byin nga ai sha n-ga, gumshem Myen hpyen dap kawn hpyen n-gun htu shadut ai lam, hkawmsa hkawmwa mungshawa ni hpe jahkrit shama san jep ai lam ni mung, ding yang galaw nga ai re hpe chye lu ai.
