SNA ni rim woi mat ai mungshawa ni hpe bai dat ya

Mogaung Sarmaw mare na SNA hpyen hpung ni rim woi mat wa ai mungshawa ni hpe bai dat ya sai lam chye lu ai.

July shata praw 8 ya shana maga, Sam Hkyeng (SNA) P.T.Ts ni rim woi mat wa ai, Sarmaw KBC nawku jawng wang, Kawa Yang hte Galale Pat Jasan jawng wang shara (3) na mungshawa marai (30) grup yin hpe July shata 10 ya shana maga bai dat ya sai lam, ginra masha ni kaw na chye lu ai.

Rim woi mat wa ai mungshawa ni hpe PCG ni kawn, jahkrup bawngban ya ai hte bai dat ya sai rai nna, hpa majaw rim woi mat wa ai lam hpe SNA hpyen hpung ni kawn, atsawm tsun jahpra dan ai lam nnga ai re hpe ginra masha langai matut tsun ai.

Sarmaw mare kata ya na zawn, SNA hpyen hpung ni mungshawa ni hpe mara kata rim woi mat ai lam ni jahkring hkring byin nga ai majaw, dai ginra na mungshawa ni shadi maja na hkrai hkawmsa nga ra ai re lam chye lu ai.