Shwegu ginra gasat gala majan matut byin nga
KIA Masat (11) Dap Ba, Masat (12) Dap Dung Shwegu ginra hta gasat gala majan matut byin nga ai lam chye lu ai.
Ndai laman gumshem Myen hpyen dap ni KIA pawng hpawm hpyen hpung ni nga ai shara de hpyen shamu shamawt htu shadut ai lam ding yang galaw nga ai majaw, shani shagu ngu na gasat gala majan byin nga ai re lam, shawnglam lit nga ai salang ni tsun ai.
July shata 19 ya shani hta mung, gumshem Myen hpyen dap Hk.L.Y (56), Hk.M.Y (602) hte Tatma (88) kata na Hk.M.Y (378, 416) pawng hpawm hpyen hpung ni, အထက်လေးလမ်းဆုံ hte ကိုင္း ရြာ mare de htu shadut lung wa ai majaw, KIA pawng hpawm hpyen hpung ni hkap shingla gasat ai kawn, gasat gala majan laja lana byin wa ai re lam chye lu ai.
Gasat gala majan byin ai hta gumshem Myen hpyen dap maga sum machyi ai lam law ai sha n-ga, laknak arung arai ni hpe mung KIA pawng hpawm hpyen hpung ni gasat zing madu la lu ai re lam chye lu ai.
Shwegu ginra hta ya aten lahkawng maga laknak kaji kaba, drone ni hte shani shagu ngu na gasat gala majan matut byin nga ai rai nna, gumshem Myen hpyen dap maga na mung, nbungli hte ding yang wa gap gasat nga ai lam na chye lu ai.
