KIA Dap Ba ( 2 ) Dap Dung ( 6 ) ginra hta gasat gala majan byin
KIA Dap Ba ( 2 ) Dap Dung ( 6 ) ginra, Nam Ya maga kawn yu wa ai Myen hpyen dap Hk.L.Y ( 255 ), Sam Hkyeng Pyi Tu Tsit ( P.T.Ts ) pawng hpawm hpyen hpung hte KIA hpyen hpung ni, November praw 8 ya jahpawt hkying 10:30am aten hta Nam Ya mare kawn Yuzana pa de yu wa ai lam numshe kaw gasat majan byin ai lam, shawnglawm shisawk ni kawn chye lu ai.
Nam Ya kaw nga ai Myen hpyen dap ni gasat majan byin ai shara de sinat kaba 60mm hte gap bun ai lam chye lu ai.
KIA Dap Ba ( 3 ) Dap Dung ( 1 ) ginra, Lungja Kawng kaw dung ai Myen hpyen dap ni mung, November praw 8 ya jahpawt hkying 3:45am aten daram hta KIA hpyen hpung ni nga ai shara Pa Taw Htamawk Kawng maga de, jak sinat hte numdaw 3 lang, laknak kaba hte 3 lang gap bun ai lam, ginra shisawk ni shana wa ai.
Lawa Yang kaw nga ai Myen hpyen ni mung Pa Taw Htamawk Kawng maga de sha laknak kaba hte gap bun ai, KIA ni mung bai nhtang gap ai lam chye lu ai.
Mungmyit Sinli Ga ( Kachin Sub-State ) KIA Dap Ba ( 4 ), Dap Ba ( 6 ) ginra de mung, Myen hpyen dap ni ndai laman grai bai shamu shamawt wa nga ai lam, buga masha ni kawn chye lu ai.
