Jawngma kanu kawa, sara/num manhkrum hpawng hte ningtawn ai jawngma ni hpe shagrau sha-a hpawng galaw
Laiza Muklum lapran tsang jawng kaw 2026-2027 hpaji ladaw a shawng ningnan lang na jawngma kanu kawa, sara/num manhkrum hpawng hte 2025-2026 hpaji ladaw hta ningtawn ai jawngma ni hpe shagrau sha-a ai hpawng hpe August shata 14 ya jahpawt hkying 9:00am aten, galaw la lu sai lam chye lu ai.
Saranum Kaba Nding Seng San (Laiza Lapran Tsang Jawng Ningtau Jawng Up) kaw nna, hkalum ga hte jawng a sumtang ni hpe tsun sanglang dan ai hte jawng kata lang ra ai arung arai ni hpe garum ya na matu, tsun lajin ai hpe chye lu ai.
2025-2026 hpaji ladaw hta ningtawn ai jawngma yawng marai (74) hte jawng man man sa ai saranum marai (6) hpe kumhpa shagrau jaw ai rai nna, jawng sara magam lit hpe shaning (20) ning hpring gun hpai nga ai, saranum Sumlut Ban Htoi hpe mung kumhpa shagrau jaw ai. Jawngma kanu/wa komiti ni kaw nna mung, jawng kata galaw la lu sai magam bungli ni hpe sumtang tang madun ai lam ni galaw ai.
Sara Kaba Lashi Lum Tu (Laiza Muklum Ningtau Hpaji Du) kaw nna, hpaji jaw mungga tsun ai hta “Jawng sara/num ni gaw jawngma ni hpe myiman nmai lata ai, mungdan langai rawt jat galu kaba wa na matu gaw, laika hpaji machye machyang lam grai ahkyak ai” lam hte ra mara ni hpe tsun hpaji jaw la sai re.
2026-2027 hpaji ladaw hta Laiza Lapran Tsang Jawng kaw sharin hkamla nga ai jawngma yawng marai (605), sharin sara/num yawng marai (43) nga ai rai nna, (1) lang na jawngma kanu/wa sara/num manhkrum hpawng hpe angwi apyaw galaw la lu sai lam chye lu ai.
