Shwegu ginra gasat gala majan matut manoi byin nga
Nmau Ginwang Ginjaw, KIA Masat (11) Dap Ba, Masat (12) Dap Dung, Shwegu ginra hta gasat gala majan matut manoi byin nga ai lam chye lu ai.
August shata 13 ya shani du hkra, Shwegu ginra hta gumshem Myen hpyen dap ni, KIA pawng hpawm hpyen hpung ni shara la nga ai de htu shadut lung wa ai majaw, gasat gala majan matut manoi byin nga ai re lam, shawnglam lit nga ai salang ni tsun ai.
Shwegu ginra hta gasat gala majan byin ai shata 2 jan nga sai rai nna, KIA pawng hpawm hpyen hpung ni dap shara nkau hpe zing madu la lu sai raitim, gumshem Myen hpyen dap ni hpyen n-gun htu shadut jat bang ai lam ding yang galaw nga ai majaw, gasat gala majan matut manoi byin nga ai re hpe chye lu ai.
Gasat gala majan byin nga ai hta gumshem Myen hpyen dap ni nbungli hte ding yang wa gap gasat ai lam galaw nga ai majaw, mungshawa dum nta law law hte hpung kyi jawng ni hten za hkrum nga ai hpe chye lu ai.
Ya aten du hkra lahkawng maga laknak kaji kaba, drone ni hte gap gasat hkat ai lam ni ding yang galaw nga ai rai nna, gumshem Myen hpyen dap kawn mung, nbungli ni hte shani shagu ngu na wa gap gasat nga ai majaw, lahkawng maga hpyen masa shaja hkat nga ai hte dai ginra na mungshawa ni mung, hkrit maja na nga taw ra ai re lam matut sagawn chye lu ai.
